Аздараўленне дзяцей Гродзенскай вобласці ў перыяд зімовых канікул

20-Студзеня-2022

На тэрыторыі Гродзенскай вобласці ў перыяд зімовых канікул з 25 снежня 2021г. па 9 студзеня 2022 г. на базах устаноў агульнай сярэдняй адукацыі і спецыялізаваных навучальна-спартыўных устаноў працавалі 185 аздараўленчых лагераў з дзённым знаходжаннем, дзе аздаравіліся 4050 дзяцей і падлеткаў.

Кожны аздараўленчы лагер арганізаваў сваю тэматыку і план працы. Новыя ўражанні юнакі і дзяўчаты атрымлівалі падчас творчых мерапрыемстваў, гульняў, віктарын, спаборніцтваў, флэшмобаў. Задзейнічаны яны былі і ў рабоце ў майстэрні Дзеда Мароза, інтэрактыўных падарожжах, што прыўнесла дадатковае чараўніцтва перад зімовымі святамі, якія так любіць кожнае дзіця.
Розныя формы арганізацыі вольнага часу на школьных канікулах прапанавалі дзецям і ўстановы дадатковай адукацыі дзяцей і моладзі.

Аздараўленчыя лагеры былі арганізаваны з абавязковым выкананнем санітарных, супрацьпажарных і іншых патрабаванняў, якія прад'яўляюцца пры арганізацыі дзіцячага аздараўлення. У мэтах мінімізацыі рызыкі распаўсюджвання інфекцыі COVID-19 у аздараўленчых лагерах таксама забяспечвалася выкананне санітарна-проціэпідэмічных мерапрыемстваў, рэкамендаваных Міністэрствам аховы здароўя Рэспублікі Беларусь.