Як навучыць хлапчукоў пастаяць за сябе, сям'ю, Радзіму? Дапамагчы стаць мацней, больш упэўнена, рашуча і смялей? Дзе можна вывучыць ваенную справу і ўбачыць, як праходзіць тэрміновая служба ва Узброеных сілах Рэспублікі Беларусь, калі табе яшчэ няма 18? Дзе хлопцы могуць убачыць і адчуць армейскае жыццё знутры - пажыць у палатках, падстроіцца пад пэўны распарадак дня, набыць новыя веды і навыкі?

З гэтай мэтай сумесна з супрацоўнікамі воінскіх часцей, пагранічных застаў, навучальных устаноў МУС і МНС у летні перыяд 2023 г. для сталічных школьнікаў была арганізавана работа 83 лагеры ваенна-патрыятычнага профілю з дзённым і кругласутачным знаходжаннем з ахопам 2150 дзяцей. Тут усё накіравана на ваенна-патрыятычнае выхаванне дзяцей, каб яны сталі больш сабранымі, дысцыплінаванымі і сур'ёзнымі, перагледзелі сваё стаўленне да сацыяльных сетак і пустога баўлення часу, а таксама зразумелі, што любоў да Радзімы і абавязак па яе абароне – не проста словы, а абавязак кожнага грамадзяніна.

Традыцыйна ў кожным раёне г. Мінска ваенна-патрыятычныя лагеры з дзённым знаходжаннем былі адкрыты на базах цэнтраў дапрызыўнай падрыхтоўкі моладзі. 1262 навучэнцаў школ сталіцы атрымалі магчымасць пазнаёміцца з вайсковымі буднямі вайскоўцаў, спасцігнуць азы вайсковай службы. Заняткі для рабят праводзілі найбольш вопытныя афіцэры. Апроч заняткаў ваеннай справай і фізічнай падрыхтоўкай для выхаванцаў лагераў былі арганізаваны шматлікія экскурсіі, спаборніцтвы, ваенна-спартыўныя гульні і эстафеты.

35 ваенна-патрыятычных лагераў з кругласутачным знаходжаннем былі арганізаваны для мінскіх школьнікаў. На працягу дзевяці дзён 888 хлапчукоў і дзяўчынак пераймалі досвед старэйшых настаўнікаў: займаліся страявой падрыхтоўкай, збіралі і разбіралі зброю, адпрацоўвалі сілавыя прыёмы, вучыліся арыентавацца на мясцовасці... Зніжку на ўзрост, вядома, ім рабілі. У астатнім - усё як у войску.

У чарговы раз на базе вайсковай часці 3214 унутраных войскаў Міністэрства ўнутраных спраў Рэспублікі Беларусь функцыянаваў кругласутачны ваенна-патрыятычны лагер «Доблесць».

Гэтым летам тут прайшлі шэсць 9-дзённых змен, апошняя завершыць сваю працу 29 жніўня. У лагеры адпачылі і далучыліся да вайсковага жыцця каля 300 падлеткаў ва ўзросце ад 9 да 15 гадоў. Сярод іх былі хлопцы з апякунскіх сем'яў, а таксама тыя, хто стаіць на ўліку ў інспекцыі па справах непаўналетніх, прызнаныя ў сацыяльна небяспечным становішчы, якія маюць патрэбу ў дзяржаўнай абароне.

Штодня выхаванцы вывучалі прадметы баявой падрыхтоўкі падраздзяленняў спецыяльнага прызначэння, практыкаваліся ў аказанні ваенна-медыцынскай дапамогі, асвойвалі навыкі стральбы з страйкбольнай, пнеўматычнай і агнястрэльнай зброі. Рэгулярна праходзілі заняткі і па асновах бяспекі жыццядзейнасці: маладое пакаленне павінна разумець, як паводзіць сябе ў той ці іншай надзвычайнай сітуацыі. Акрамя таго, была магчымасць пазнаёміцца з тэхнікай, якая стаіць на ўзбраенні воінскай часці, паспрабаваць свае сілы ў рукапашным баі.

Таксама ў рэжыме 2-х змен на базе 120-й асобнай гвардзейскай механізаванай брыгады ў летні перыяд 2023 г. функцыянаваў ваенна-патрыятычны лагер "Мужнасць". У лагеры адпачылі і аздаравіліся 63 падлеткі з Фізкультурна-спартыўнага цэнтра дзяцей і моладзі Першамайскага раёна горада Мінска.

Распарадак тут вайсковы: пад'ём, зарадка, запраўка ложкаў, мыццё, сняданак, заняткі. У раскладзе таксама і экскурсіі ў музеі горада Мінска. У час заняткаў дзеці знаёміліся з узорамі ўзбраення, ваеннай і спецыяльнай тэхнікі, якая складаецца на ўзбраенні злучэння, а таксама спаборнічалі ў спартыўных гульнях.