Урачыстае адкрыццё першай летняй змены адбылося 5 ліпеня ў аздараўленчым лагеры "Церамок", размешчаным у Валожынскім раёне Мінскай вобласці.

У летнім сезоне хлопчыкаў і дзяўчынак прынялі на адпачынак і аздараўленне 30 загарадных лагераў г.Мінска. Пазней за ўсіх адкрыў сваю першую летнюю змену аздараўленчы лагер «Церамок». У гэтым годзе ён змяніў уласніка і ўвайшоў у склад ДУА «Мінскі гарадскі адукацыйна-аздараўленчы цэнтр «Лідэр». Ва ўрачыстай абстаноўцы юныя выхаванцы далі старт вясёламу лету ў «Церамку».

У лагеры да адкрыцця быў праведзены рамонт.

- Мы правялі касметычны рамонт усіх карпусоў і пакояў, абнавілі веранду. Над афармленнем будынкаў лагера працавалі дызайнеры. З разыначак: з'явілася столь, якая свеціцца, а фасады ўпрыгожаны яркімі арыгінальнымі банэрамі, зробленымі на аснове дзіцячых малюнкаў, - распавяла начальнік «Церамок» Яўгена Сырыца. - Мы пыталіся ў хлопцаў, якія тут раней адпачывалі і хацелі б зноў правесці лета ў лагеры, чаго ім не хапае. Дзякуючы іх прапановам у нас з'явіўся новы геймерскі пакой: у ім устаноўлены вялікія тэлевізары, гульнявая прыстаўка, рэлакс-зоны з мяккімі крэсламі, пуфікамі.

Гэтым летам «Церамок» будзе працаваць у тры змены. Агулам плануецца аздаравіць каля 400 дзяцей ад 6 да 15 гадоў. У даляглядзе лагер можа стаць круглагодным.

На ўрачыстай лінейцы ў гонар адкрыцця змены прысутнічалі намеснік старшыні Мінгарвыканкама Андрэй Валер'евіч Стрыгельскі, старшыня Мінскага гарадскога Савета дэпутатаў Арцём Мікалаевіч Цуран, начальнік Мінскага гарадскога ўпраўлення Рэспубліканскага цэнтра па аздараўленні і санаторна-курортным лячэнні насельніцтва Валерый Аркадзьевіч Нафрановіч.

Пасля мерапрыемства адбыўся круглы стол, прысвечаны аздараўленчай кампаніі і функцыянаванню дзіцячых лагераў з удзелам дэпутатаў Мінскага гарадскога Савета дэпутатаў.

- За лета плануем аздаравіць каля 78 тыс. хлопчыкаў і дзяўчынак у лагерах усіх тыпаў - як з дзённым, так і кругласутачным знаходжаннем. У гэты сезон іх загружанасць складае 100%. Ужо ў лютым-сакавіку практычна ўсе месцы ў загарадныя аздараўленчыя лагеры былі забраніраваны, - адзначыў начальнік Мінскага гарадскога ўпраўлення Рэспубліканскага цэнтра па аздараўленні і санаторна-курортным лячэнні насельніцтва Валерый Нафрановіч. - Толькі за першы летні месяц у загарадных лагерах, а таксама ў лагерах з дзённым знаходжаннем, арганізаваных на базах устаноў па адукацыі, адпачылі больш за 39 тыс. юных мінчан. Змены прайшлі спакойна, без усялякіх надзвычайных здарэнняў. З мэтай своечасовага рэагавання на аператыўнае становішча супрацоўнікі ГУУС Мінгарвыканкама ў складзе пяці мабільных груп забяспечваюць ахову грамадскага парадку і бяспечнае знаходжанне дзяцей у аздараўленчых лагерах, размешчаных на тэрыторыі Мінскай вобласці.

ГУУС Мінгарвыканкама рэкамендуе прадпрыемствам-уласнікам у аздараўленчых установах, якія знаходзяцца ў іх на балансе, арганізаваць відэаназіранне. І некаторыя лагеры ўжо сёння абсталяваны відэакамерамі па ўсім перыметры.

- Аздараўленчая кампанія праходзіць паспяхова. Ацэнка санітарнай службы такая: істотных парушэнняў у рабоце лагераў не выяўлена. Самае галоўнае - забяспечана бяспека дзяцей, - падкрэсліў А. Стрыгельскі. - Мы штогод удасканальваем адукацыйныя праграмы. Яны павінны быць цікавыя дзецям, а адпачынак - карысны, у тым ліку і з пункту гледжання выхавання. Павялічылася колькасць профільных лагераў, сярод якіх і лагеры ваенна-патрыятычнай накіраванасці. Падабраны добры кадравы склад выхавацеляў.

Па словах Андрэя Стрыгельскага, аздараўленчыя лагеры набіраюць усё большую папулярнасць. Яны вельмі запатрабаваны.

- Сёння мы задавальняем запыт на летні адпачынак дзяцей. У асобных лагерах нават фарміруецца чарга на набыццё пуцёвак на жаданую змену. Гэта сведчыць аб высокай якасці паслуг па аздараўленні, - падкрэсліў А. Стрыгельскі.

- Штогод мы павялічваем фінансаванне на ўтрыманне лагераў. Сродкі накіроўваюцца найперш на ўдасканаленне матэрыяльна-тэхнічнай базы. Істотную матэрыяльную дапамогу аказваюць і прадпрыемствы, на балансе якіх знаходзяцца загарадныя аздараўленчыя комплексы. Важны напрамак - падтрымка насельніцтва: выдзяляюцца сродкі на патанненне кошту пуцёвак. І на гэтыя мэты накіроўваюцца як дзяржаўныя сродкі, гэтак і сродкі мясцовага бюджэту. У бягучым годзе мы пашырылі пералік атрымальнікаў гэтых сродкаў. Размова ідзе аб работніках бюджэтных устаноў не толькі камунальнай формы ўласнасці, але і дзяржаўнай, - распавёў Арцём Цуран.