Лета для школьнікаў - гэта час актыўнага адпачынку, новых знаёмстваў і яркіх уражанняў. У Віцебскай вобласці штогод рэалізуецца маштабная праграма летняга аздараўлення дзяцей: тысячы хлопчыкаў і дзяўчынак адпраўляюцца ў выхаваўча аздараўленчыя лагеры, дзе спалучаюцца адпачынак, спорт, творчасць і пазнавальная дзейнасць.

У абласной нарадзе на тэму летняй аздараўленчай кампаніі 2026 года прынялі ўдзел намеснік старшыні Віцебскага аблвыканкама Аляксей Гуйда, начальнік прадстаўніцтва Віцебскае абласное ўпраўленне Рэспубліканскага цэнтра па аздараўленні і санаторна-курортным лячэнні насельніцтва Алеся Чорная сацыяльнай сферы, уласнікі аздараўленчых лагераў, а таксама прадстаўнікі праваахоўных органаў, сілавых структур, аховы здароўя, санітарнага нагляду вобласці.

У летні перыяд 2026 года ў Віцебскай вобласці плануецца аздаравіць 47700 дзяцей, у тым ліку ў лагерах з кругласутачным знаходжаннем дзяцей - 16900 дзяцей, у намётавых - 1800 і ў лагерах з дзённым знаходжаннем - 29000 дзяцей. Дзяржавай на выплату датацыі выдзелена больш за 9,0 млн. рублёў.

Больш за 1400 юнакоў 10-х класаў упершыню сёлета праходзяць вучэбна-палявыя зборы ў фармаце кругласутачнага знаходжання ў намётавых лагерах ваенна-патрыятычнага профіля. Будучыя абаронцы Айчыны вывучаюць агульнавоінскія статуты, праходзяць тактычную, страявую і агнявую падрыхтоўку. Акрамя гэтага, для дзяцей арганізаваны прафарыентацыйныя сустрэчы, мерапрыемствы спартыўнага, ваенна-патрыятычнага напрамку, прагляд дакументальных і мастацкіх фільмаў ваенна-патрыятычнай тэматыкі.

Кошт пуцёвак у лагеры патанняецца за кошт сродкаў рэспубліканскага бюджэту. Памеры такога патаннення індэксуюцца штогод.

Улетку гэтага года ў Віцебскай вобласці сярэдні кошт пуцёўкі ў лагер з кругласутачным знаходжаннем складзе каля 780 рублёў, а памер яе патаннення за кошт бюджэтных сродкаў - 302 рублі.

Кошт пуцёўкі ў лагер з дзённым знаходжаннем складзе каля 175 рублёў, памер яе патаннення - 127 рублёў.

Усяго ў Віцебскай вобласці ў летні перыяд функцыянуюць 38 загарадных лагераў.

Летняе аздараўленне ў Віцебскай вобласці - гэта не проста адпачынак, а важны этап выхавання і развіцця маладога пакалення. За час знаходжання ў лагеры дзеці ўмацоўваюць здароўе, вучацца самастойнасці, сяброўству і ўзаемавыручцы, набываюць новыя навыкі і зараджаюцца пазітыўнай энергіяй перад новым навучальным годам.

З кожным годам праграмы ў лагерах становяцца больш разнастайнымі, інфраструктура - сучасней, а падыходы да арганізацыі адпачынку - больш гнуткімі і арыентаванымі на інтарэсы дзяцей. Гэта дазваляе вобласці захоўваць высокія стандарты дзіцячага аздараўлення і ствараць для школьнікаў па-сапраўднаму незабыўныя летнія канікулы.